Isenser n tidet1

ISENSER N TIDET (Amur1u)

Mayed iγiyen ad as-yini i yizem ixmej-as yimi ?
Rẓem-d, reẓ-d, reẓ-d ameẓẓuγ
Ad awen-ssikzeγ aferruγ!
Nekkin, awal, ad t-ssefruγ
A wi, a ti nna γur amuγ!
Zedmeγ-d iḍ-a, ad awen-ssnuγ
Ayenna rtiγ ad ig i wuluγ.
Maca tidet ayd nn-azuγ:
Terẓag teγmel dinna s seksuγ:
Yaq! Yaq! Yaq!
Yaq! Yaq! Yaq!
Nekka-d iḍelli azazraf,
Timukras amm seksu g uzlaf ;
Wenna d-iffγen ar ittsettaf
Tireggam d tfu i uzraf.
S titi d wuγus n tsinaf
N tmunnaḍ d lbaṭel aγwezzaf,
Ur imdiy g yimi γas ticaf,
Ulawen gen imejjaḍ s uzεaf.
Yaq! Yaq! Yaq!
Yaq! Yaq! Yaq!
Anezzarfu, uress is gnan,
Ičč’ aγ tizukin wattekkwan,
Ikcem-d nbedd amm yicirran,
Yugi awd adida n yizan,
Awal amaziγ nnemran,
Gan aseḍṣu γur yinigan:
Isawel Sekku i umastan
Maca imta maγef msasan.
Yaq! Yaq! Yaq!
Yaq! Yaq! Yaq!

Mayed iγiyen ad as-yini i yizem ixmej-as yimi ?
Σumar DERWIC
Igwelmimen g 14 abril 2960/ 28-04-2010