USHT shënon 7 marsin

Universiteti Shtetëror i Tetovës ka shënuar sot me një program kulturor e artistik, 127 vjetorin e hapjes së mësonjëtores së parës në gjuhën shqipe në Qytetin e Korçës. Përpjekjet e patriotëve korçarë dhe atyre në diasporë, veçanërisht të patriotëve të Bukureshtit dhe Stambollit bënë të mundur hapjen më 7 Mars të 1887-ës, të "Mësonjëtores Shqipe". Edhe pse në kushte të vështira, kur mësimi i gjuhës shqipe nën sundimin osman ishte rreptësisht i ndaluar, mësonjëtorja e Korçës qëndroi e hapur për gati 15 vjet. Drejtues të saj ishin figura të njohura të Rilindjes shqiptare si: Pandeli Sotiri, Petro Nini Luarasi etj. Kontributi i madh që këta atdhetarë dhe veprimtarë të shquar dhanë për kombin, dëshmohet nga dëshira e zjarrtë që ata kishin për të përhapur dijen në popull. Një vështrim të gjerë, në këtë 127 vjetor, sollën dekani i fakultetit filologjik Fatmir Sulejmani dhe historiani Nebi Dervishi.

"Mësonjëtorja e parë shqipe është mbajtur në këmbë kryesisht me financat e mërgimtarëve shqiptarë të kohës. Në këto kushte, ajo e pati shumë të vështirë funksionimin, por, ia doli mbanë të ruaj pavarësinë nga ndikimet e jashtme që sigurisht synonin derdhjen e energjive në mullirin e të tjerëve, të atyre që nuk ia donin të mirën Shqipërisë, e cila kishte nevojë për një shkollë që do të përafronte shqiptarët edhe ashtu të përçarë në vija krahinore dialektore dhe fetare", deklaroi Fatmir Sulejmani, dekan i Fakultetit Filologjik.

"Lëvizja shqiptare për arsim kombëtar mori hov edhe më të madh pas vitit 1908, pas mbajtjes së kongresit të Manastirit për njehsimin e alfabetit unik të shqipes, e sidomos pas mbajtjes së kongresit mbarë-shqiptarëtë Elbasanit nga 2 deri në 8 shtator të vitit 1909. Kongresi solli vendimin historik për hapjen e një shkolle të mesme pedagogjike normale, që u hap në Elbasan më 1 dhjetor të 1909", tha Nebi Dervishi, historian. Alsat M