Tirana e zhurmshme

I gjithë qyteti i Tiranës ka nivel të lartë të ndotjes akustike e shkaktuar kryesisht nga trafiku dhe boritë e automjeteve. Interesimit të Tv Klan, Agjencia Kombëtare e Mjedisit i vuri në dispozicion matjet e nivelit të zhurmës gjatë vitit 2018 në 5 pika kryesore në kryeqytet.

Nga të dhënat, në të gjitha stacionet e monitoruara kemi tejkalim të normës ditore dhe të normës natën.

"Sot jemi jemi me një situatë prej 72 decibel. Normat e lejuara janë 50 dhe 55 decibel", thotë Migen Qiranxhi, anëtar i Qëndresës Qytetare.

Zona e Shkollës së Bashkuar, tejkalim të nivelit të ndotjes me 12 % (61.7 decibel)
Zona e Faramacisë 10 , tejkalim të nivelit të ndotjes me 16% (63.93 decibel)
Zona e Stacionit të  Trenit, tejkalim të nivelit të ndotjes me 24% (68.50 decibel)
Zona tek 21 Dhjetori, tejkalim të nivelit të ndotjes me 20% (66.17 decibel)
Zona tek Stadiumi Dinamo, tejkalim të nivelit të ndotjes me 28%  (69.74 decibel)

Sipas mjekëve, ndotja nga zhurmat e trafikut të rënduar, krijon probleme të pariparueshme tek fëmijët dhe të rriturit në sistemin dëgjimor, deri dhe në humbje të dëgjimit.

"Ekspozimi ndikon negativisht në dy sisteme, dëgjimor dhe nervor. Dëmtimet ndodhin me kalimin e kohës. Ky është ndikimi negativ që mund të kemi tek moshat fëminore dhe te reja, dhe ndarja tyre që janë të ekspozuar ndaj zhurmave. Ky çon në një dëmtim të dëgjimit minimal, që fillon me një zhurmë në vesh. Këto janë dëmtime të parikthyeshme. Këto më pas çojnë në stres, në depresion. Në zona të caktuara është e ndaluar me ligj që t'i biesh borisë, ne jemi në mes të spitalit dhe ti dëgjon borinë që bien bien si në mes të trafikut", shprehet Prof.Dr. Suela Sallavaçi.

Por si mund të parandalohet ky nivel i lartë i ndotjes akustike në kryeqytet?

"Duke vendosur sinjalistikën rrugore, siç janë gjobitja e drejtuesve të mjetit që përdorin borinë pa kriter, probleme janë edhe automjetet e transportit publik që i bien borisë, dhe ato duhet të pajisen me bori elektronike", thotë Qiranxhi.

Prej vitesh, përveç ndotjes së automjeteve, një tjetër shqetësim i banorëve të kryeqytetit mbetet edhe ndotja nga lokalet dhe pubet e natës të cilët funksionojnë me muzikë të lartë tej normave të lejuara.

Madje duke tejkaluar edhe orarin se kur mund të përdoret muzika e lartë. Duke e tejkaluar normën 45 decibel. Rreth 20 milionë të rritur në  Europë vuajnë nga pagjumësia për shkak të faktorit zhurmë. Çdo vit mbi 900 mijë raste të hipertensionit shkaktohen nga zhurmat.