Testimi, pyetjet publikohen në uebfaqen e MASH-it

Sonte, pas orës 21:00, në faqen zyrtare të Ministrisë së Arsimit dhe Shkencës (MASH), do të shpallen pyetjet e testimit të jashtëm, që nxënësit do të realizojnë në datat 22 dhe 24 janar. Siç bëri të ditur ministri Spiro Ristovski, testimi i jashtëm do të vlejë për nxënësit e vitit të tretë dhe të katërt të shkollave të mesme. Të interesuarit, pyetjet mund t'i gjejnë në gjuhën maqedonase, shqipe dhe turke. Sipas Ristovskit, më 19 janar do të shpallet lista e emrave të nxënësve, dhe dy lëndët ku ata do të testohen. Ndërkohë, deri më 10 janar, do të mund të raportohen parregullsitë ose paqartësitë e mundshme që do të mund të ballafaqojnë nxënësit, gjatë leximit të pyetjeve.

"Unë dua t'ju njoftoj se në faqen e Ministrisë së Arsimit, të Qendrës Shtetërore për Testim, Byrosë për Zhvillimin e Arsimit dhe Qendrës për Arsim dhe Trajnim Profesional do të krijohet mundësia që të sigurohet lidhje e drejtpërdrejtë me bazën kryesore, në të cilën do të shpallen pyetjet për testimin e jashtëm. Faqja ku do të vendosen pyetjet është www.prasanjaeksterno.dic.edu.mk. Aty mund t'i gjeni të gjitha pyetjet në gjuhët maqedonase, shqipe dhe turke, ashtu siç edhe zhvillohet mësimi në vend", deklaroi Spiro Ristovski, ministër i arsimit. Alsat-M