Sielsgebed

Meer as 12 bekende kunstenaars het kragte saamgesnoer om Helpende Hand se CD, Hande vir Hoop, te skep. Dit is die eerste keer sedert 1989 wat ʼn groot aantal bekende Afrikaanse kunstenaars saam ʼn lied van hoop sing. Die sanger en akteur, Mel Botes, het spesiaal vir Helpende Hand ʼn lied, Sielsgebed, geskryf. Sielsgebed is die laaste lied wat Mathys Roets opgeneem het voor sy ongeluk. Jannie Moolman, Dozi, Kurt Darren, Piet Botha, Kevin Leo, Carike Keuzenkamp, Rina Hugo, Anna Davel en Juanita du Plessis is van die ander kunstenaars wat deel was van die projek. Die opbrengs van die CD gaan spesifiek vir opheffingsprojekte wat gemik is op Afrikaanse kinders en kinders wat slagoffers is van geweld.
Daar is baie dinge in ons land wat nie meer reg gepraat kan word nie, maar wat reg gedoen moet word. Waar dinge reg gedoen word, kom daar hoop vir die toekoms en word die armoedekringloop gebreek. Die huidige armoedevraagstuk raak duisende Afrikaanse kinders se toekoms. Duisende Afrikaanse kinders is afhanklik van voedingskemas en het nie die fondse om naskoolse opleiding te ontvang nie. In dié uitsiglose omstandighede het Helpende Hand ʼn unieke taak om te vervul, naamlik om deur opleiding, hulpverlening, bewusmaking, gemeenskapsbetrokkenheid en ontwikkeling hoop vir kinders te skep. Met ons vyf vingerafdrukke vat Helpende Hand graag hande met mense wat wil help om die nood van die weerloses in die samelewing aan te spreek.
Hiermee wil Helpende spesiaal dankie sê aan Mel Botes en elke kunstenaar wat met hierdie CD hoop bring. Elkeen van julle het ʼn spesiale plek in Helpende Hand se hart vir hoop.
Solidariteit Helpende Hand http://www.helpendehand.co.za/
Solidarity Helping Hand Fund http://www.helpinghandfund.co.za/