Si të ndryshosh monedhën e kredisë

Që prej datës 1 Qershor, cilido prej konsumatorëve që ka një kredi në monedhë tjetër nga ajo që merr të ardhurat, ka të drejtë të kërkojë ndryshimin e saj në bankën që ka dhënë huanë.

Banka e Shqipërisë ka miratuar një rregullore të re, e cila i jep fuqi çdo qytetari që ka kredi konsumatore apo me kolateral, që të kërkojë ndryshimin e monedhës.

Në rastin që ke një kredi në Euro, por paga mujore është në Lekë, atëherë të lind e drejta për të ndryshuar kredinë në monedhën që merr rrogën. E njëjta gjë do të vlejë edhe për kreditë të cilat janë në Dollarë apo në Lekë.

Banka Qendrore sqaron se kursi i këmbimit për monedhën që do të ndryshohet merret si referencë ai në ditën që kryhet konvertimi i kredisë, ndërsa norma e interesit do të përcaktohet mes palëve që bëjnë ndryshimet në kontratë.

?Kursi i këmbimit me të cilin do të realizohet konvertimi i monedhës së kredisë, do të jetë kursi zyrtar i bankës në ditën që kryhet konvertimi, nëse nuk përcaktohet ndryshe në kontratë. Ndërsa norma e interesit në këtë rast pas konvertimit, do të përcaktohet si gjithnjë në marrëveshje midis palëve në kontratën e kredisë ose në ndryshimet apo shtesat e saj.?

Rregullorja tashmë detyron edhe bankat që të japin informacion ilustrues për klientët të cilët marrin kredi në monedhë të ndryshme nga ajo që kanë të ardhurat. Kjo nismë është pjesë e paketës së deurizimit dhe synon që të ulë stokun e kredisë në euro.