Rendohet moti, rrezik permbytjesh

Shqipëria mund të përballet me përmbytje gjatë pesë ditëve në vijim për shkak të reshjeve me intensitet të lartë që priten në fundjavë. Nga 30 Nëntori deri më 4 Dhjetor moti do përkeqësohet me reshje shiu në gjithë territorin e vendit.

Kjo mund të shkaktojë prurje të mëdha në basenet e Vjosës Semanit, Shkumbimit dhe lumenjve të tjerë. Vërshim të ujrave mund të ketë në qytetet kryesore si Tiranë, Lezhë, Durrës, Korçë, Berat, Vlorë, Fier dhe Gjirokastër.

Drejtoria e Emergjencave Civile ka kërkuar nga prefektët e qarqeve dhe institucioneve lokale të marrin masat dhe të jenë të përgatitur për këtë situatë.

Shemsi Prençi: ?Dita e premte është një ditë me rrezikshmëri shumë të lartë përsa i përket zonës së Shqipërisë jugore, duke filluar nga Tirana e poshtë që do ketë reshje gjatë gjithë ditës. Pjesa më e kërcënuar do të jenë rajonet e Vlorës dhe të Fierit?.

Po kështu është kërkuar që të mbahen me energi hidrovoret, spitalet, ujësjellsat. Lumenjtë dhe argjinaturat pritet të kontrollohen për riparimin e pikave të dobëta të identifikuara nga specialistët. Për çdo situatë është kërkuar që të mbahen kontakte me drejtues të Emergjencave Civile dhe Policinë e Shtetit.