Platformë për ringritjen e Partisë Demokratike

Përmes një dokumenti të firmosur nga një grup i madh përfaqësuesish politikë, lëvizja për ringritjen e Partisë Demokratike ka paraqitur një platformë, që sipas saj, synon ta nxjerrë këtë forcë politike nga kriza e thellë ku e çoi drejtimi i gabuar i Lulzim Bashës dhe rikthimin sa më shpejt të saj në një alternativë të denjë për shqiptarët.

Duke akuzuar Bashën si përgjegjësin kryesor për rezultatin katastrofik të Partisë Demokratike në zgjedhjet e 25 Qershorit dhe farsën elektorale të 22 Korrikut, kjo lëvizje kërkon që ringritja e Partisë Demokratike të kalojë përmes një procesi të thellë analize dhe zgjedhjesh në të gjitha nivelet, të shoqëruar me ndryshime statutore.

Kështu, në dokument propozohet caktimi i një afati jo më vonë se 9 muaj për mbajtjen e zgjedhjeve të reja në parti, ku të përfshihen të gjitha institucionet e saj.

Për të patur një proces të drejtë, të lirë dhe të pandikuar kërkohet gritja e një komisioni zgjedhor me përfaqësim të barabartë, që të kryesohet nga një përfaqësues i Lëvizjes për Ringritjen e PD, si dhe ruajtja e këtij përfaqëesimi dhe këtij formati në të gjitha komisionet e votimit në nivel dege dhe qarku.

Pjesë e platformës është edhe zhvillimi i një procesi i analize në parti, që do të drejtohet nga një grup pune me përfaqësim të balancuar, ku në qendër të tij të ketë sqarimin dhe trasparencën për çështjet e mëdha të Partisë Demokratike, që nisin me marrëveshjen e 18 Majit, heqjen nga fushata të simboleve të partisë, hartimin e listave për deputetë, strategjinë e fushatës, shkeljet flagrante të statutit, si dhe vendimet personale të kryetarit apo të të tjerëve, që ndikuan në humbjen e rëndë të 25 Qershorit.

Si garanci për një bashkëjetesë demokratike shihet krijimi i një komisioni të balancuar, që do të përpilojë dhe hartojë ndryshimet e nevojshme statutore, të cilat do të respektohen nga anëtari më i thjeshtë e deri tek kryetari i saj.

Grupimi thotë se vetëm një parti e bashkuar, e demokratizuar, ku njihet përgjegjësia, ku pranohet ajo dhe reflektohet për korrigjimin e çdo deformimi të qëllimshëm ose jo, mund t'ia dalë që të kapërcejë çdo përplasje apo mospërputhje të brendshme dhe të bëhet e aftë për të fituar zgjedhjet dhe për të qeverisur vendin.

Në listën e firmëtarëve të dokumentit bie në sy mungesa e Topallit dhe Imamit, dy figurave kryesore të PD, që kërkuan të parët dorëheqjen e Bashës, sapo ai shpalli listat e kandidatëve për deputete, si dhe ajo e ish-ministrit Genc Ruli.

Tv Klan