Nkululeko Mdudu - |-|Izinto Azifani~|\|

Imoto ayisengwa, Inkomo ayokhewla.
Imoto ayixhelwa, Inkomo ayiqhelwa.
Imoto ayiyonkomo, Inkomo ayiyomoto.
Inamafutha kodwa ayinyathelwa;
Inkomo, ayiyomoto.

Imoto ayiyonkomo:
Amafutha ayo aselwa yiyo;
Inebisi lokubasa,
Ibona ebusuku,
Nakusasa kukho ikhephu.

Iinkomo zazilila;
Kub' iimoto zazilawula.
Iinkomo zazisitya,
Kwimbalela zazibhitya.
Iimoto zazibaleka,
ezinamatreyila ziwabeleka.
Iinkomo zimkiswa liphango,
Iinkunzi zithelekiswa lithango.
Iimoto azinamazi,
Ikhaya ngumnikazi.
Iinkomo zinobuhlanti,
Iimoto zinegaraji.
Iinkomo ziyazityela.
Iimoto ziyagalelwa.

Iimoto ayizonkomo,
Iinkomo ayizomoto.
Zineempondo ziyahlaba;
Zinamanqina ziyakhaba.
Xa zingqubana azityoboki ziyahlabana.
Ziyagula, ziyagxwala,
Emswaneni ziyakhala.
Zisusa ibhadi,
Zisusa iqonya.
Aziva mnqandi,
Xa sezikhonya.

Inkomo ayiyomoto,
Imoto ayiyonkomo;
Ayizali, ayilali,
Ayikhuli ayikhali.
Ayixhelelwa magqirha,
Ayiphekelwa maYira.
Ayiyonto konozakuzaku,
Ayiwoyiki namabhaku.
Imisebenzi iyayenza;
Yona ikukusebenza.

Izinto azifani:
ngokubaluleka azishiyani.
Bathi iinkomo zezamafama,
bayayitya kodwa imyana.
bathi iinkomo zezabelusi,
kodwa bayalisela ubisi.
neemoto zibalulekile kuthi.
siyazidinga izithuthi;
Iinkomo ziimoto zamandulo.
azinazinjini nazitulo,
Iimoto zinkomo namhlanje nazo;
akukho sityebi singenazo.

Nkululeko Mdudu

http://www.poemhunter.com/poem/izinto-azifani/