Luciano Somma - 'O surdo e 'a cecata

E cammenammo p’ ’e strade d’ ’o munno
mane ’int’ ’e mmane, comme ’int’a nu suonno,
nuie simme nate: io surdo e tu cecata
però cu nuie ’a sciorta nun è ’ngrata.

Veco sulo pe’ tte, tu pe’ mme siente
e ce vulimmo bbene overamente
pecch'è sincero chistu sentimento
ch'ha saputo da' tutto dint'a niente.

Pure si tu me siente e nun me vide,
e parle mentre io veco e nun te sento,
io sento mille voce ’int’ ’o silenzio
tu vide ’a luce ’int’ all'oscurità.