Luciano Somma - 'O prufessore

All’angolo d’’e scale d’’o “Petraro”
Cu’ nu cappotto tutto spertusato
Cu’’o bastunciello e cu’ nu sguardo amaro
Io l’aggio visto ajere, appuntunato.
‘Stu vicchiariello ca teneva mente
‘a ggente che passava cumpiaciuto,
m’ha purtato, accussì, ‘mpruvvisamente,
a chi vulevo bbene e aggio “temuto.”
Teneva ‘e spalle larghe ‘e nu gurilla,
teneva ‘a voce forte ‘e nu tenore
quanno traseva in classe cu’ nu strillo
tremmavemo dicenno: “’O Prufessore”!
Quanta ricorde dint’a nu mumento,
vedenno chistu viecchio cu’ l’affanno,
e che malinconia a tenerla mente
penzanno comme so’ vulate l’anne.
Cu’’o mantesino, ‘a borza e ‘a marennella,
‘e scarpe arrepezzate a meze sole,
me veco miez’all’ati guagliuncelle
quanno, cuntente e allere ieveme a’ scola.
‘O Maestro alluccava. “Si na crapa
Vaje na schifezza in Storia e Geografia
Tu tiene ‘a segatura dint’’a capa
Nun riesce a ‘mpararte na poesia”.
Mò ca ‘e poesie n’aggio scritto tante
E saccio bone ‘a Storia e ‘a Geografia,
comme vurria turnà pe’ nu mumento
mò n’ata vota nnante a’ scrivania.
E nun vedè ‘stu viecchio strascenato
All’angulo d’’e scale d’’o “Petraro”
Cu’ nu cappotto tutto spertusato
Cu’’o bastunciello e cu’ nu sguardo amaro.