Luciano Somma - Gelusia

Nu sole stanco,
ancora muorto ‘e suonno,
se scummoglie da ‘e nuvole,
pe’ se cuccà cu tte;
cu tte ca staje durmenno,
comme a na Madunnella,
cu’’o vraccio ch’arreposa ‘mpietto a mme.
E io so’ quase geluso
‘e chistu sole, masculo,
ca t’accarezza ’a faccia
facente sunnà:
forze n’atu calore,
n’atu bbene, chisà…
E m’addimanno e penzo,
e nun vurria penzà,
‘st’ammore quantu tiempo po’ durà.
Ogge, dimane, n’anno…
…forze è fernuto ggià.
Me pare ‘e vedè ‘o juorno
Ca n’atu sole, ‘nzisto,
te po’ venì a scetà…
Io restarraggio suonno
Tu e isso na rialtà!