Luciano Somma - Gelo

Nu ggelo
me trase 'int''e ccarne
passanno p''e vvie
addò so' nnato
addò ogne sfraveca 'e mure
arape 'a ferita
d''o tiempo passato.

Addò steve 'o puosto e zi' 'Ntuono
ce sta n'automobbile 'e lusso
e nun ce stà cchiù a funtanella
vicino 'a carretta d''o "russo".

Me pareno nove sti strade
e pure 'o palazzo, 'o purtone,
me pare 'e vedè nu guaglione
cu''a faccia 'e nu viecchio, signata...

Me fisso guardanno 'o puntone
penzanno a nu suonno luntano
sperduto 'int'a notte d''o tiempo
spezzato tra iere e dimane...

Me sento sciogliere 'o ggelo
vedenno a n'amico scurdato
n'abbraccio, po' n'ato, po' n'ato,
che dice? Ch fai? Addò si' stato?

Me pare 'e turnà comme aiere
trasenno 'int''o vascio lustrato
'a tazza 'e cafè dint''e mmane
me giro e m'avoto stunato.

Parlammo d''e ccose 'e ogne juorno
d''a ggente ch'è viva o ch'è morta
d''e figlie, 'a mugliera, d''e frate,
d''o tiempo che passa, d''a sciorta...

'O ggelo me trase 'int''e ccarne
vedenno 'int''a n'angulo 'e muro
na vecchia assettata che tremma
cu' ll'uocchie affunnate 'int''o scuro...

Comm'erano belle na vota
quann'io m''e ssunnavo guaglione
speranno chisà mai che cosa...
che scherze che fà l'illusione...

N'abbraccio, nu breve saluto,
nun lasso sultanto nu vico,
nun lasso nu surzo 'e passato
ma tutto nu munno, già antico...