Luciano Somma - 'E vvote sonno...

‘E vvote sonno
‘e stà int’’a nu vascio
Addò nun ‘mporta
Si è passato n’ora,
nu juorno, n’anno
oppure ‘a vita sana.
Addò ce stanno sempe ‘e stesse facce,
maschere senza tiempo,
cu’ dint’all’uocchie, stanche,
ll’ombra, velo ‘e tristezza,
eternità.
Ma ‘a chelli vvocche,
cunzumate ‘e strille,
nun siente maje
‘a ferita ‘e na jastemma!
Addò l’ommo è ‘o marito,
addò nu pate è pate,
addò nu frato è frato
addò na mamma è overamente: Mamma!
Gente che a miezejuorno
Quanno magna, si magna…
Se fa ‘o segno d’’a Croce.
Addò ll’unica luce
Stà dint’’a nu lumino
Appicciato, ‘ncap’’o lietto,
annanze a na Madonna.
Addò na “scampagnata”
Fatta na sola vota
Te l’arricuorde pe’ tutta na vita.
Addò ‘a stella filante
Mmane a na criaturella
Diventa nu “tesoro”
No ll’unica pazziella.
Addò quann’è Natale
Te pare overo ‘e stà miez’’o presebbio
E a’ ‘zampugnaro ce parle cu’’o tu.
Io forze sto parlanno ‘e n’atu munno?
Ma che ce pozzo fa si ‘e vvote, sonno…