Luciano Somma - 'A sciorta mia

Tengo ‘o fierro ‘e cavallo ‘int’’o purtone,
e tenco appiso ‘o cuorno ‘int’’a saletta;
‘o tridece ‘ncullato a tutt’’e pporte
e ‘o scartellato sempe a pied’’o lietto.

Però tengo azzeccata ‘a malasciorta
aret’’e rine ‘a quanno songo nato,
faccio ‘e scungiure ma nun fanno effetto,
chisà pecchè ‘a furtuna m’ha schifato…

Joco tutt’’e semmane a ‘o banco lotto,
e maje aggio pigliato ‘o primmo aletto;
si faccio na schedina a ‘o totocalcio,
pozz’essere sicuro, doppo ‘a jetto…

E tiro annanze…tanto pe’ campà
cu’ chello ca me passa ‘o principale,
speranno ca nu juorno sta furtuna
me vene finalmente a tuzzulià.

Emozionato, l’arapesse ‘e braccia,
e lle spiasse: “Che ce faje tu ccà?
Doppo tant’anne?...Te si ricurdata…
E mò me si’ venuta a cunzulà?”

E so’ sicuro ca me rispunnesse,
cu’’o pizzo a rrisa e cu’ na faccia tosta:
“Ma nun si tu chillo ca io cercavo…
Scusame tanto…aggio sbagliato ‘a porta!...”