Google loan service

ഗൂഗിൾ വഴി ഇന്ത്യക്കാർക്ക് വായ്പയും



ഗൂഗിളിന്റെ ഓൺലൈൻ പെയ്‌മെന്റ്‌സ് സേവനത്തിലൂടെയാണ് വായ്പകളും ലഭ്യമാക്കുന്നത്



ആഗോള സെർച്ച് എൻജിൻ കമ്പനിയായ ഗൂഗിൾ ഇനി മുതൽ ഇന്ത്യക്കാർക്ക് വായ്പയും ലഭ്യമാക്കും.ഗൂഗിളിന്റെ ഓൺലൈൻ പെയ്‌മെന്റ്‌സ് സേവനത്തിലൂടെയാണ് വായ്പകളും ലഭ്യമാക്കുന്നത്. പെയ്‌മെന്റ്‌സ് ആപ്പിന്റെ പേര് ‘ഗൂഗിൾ തേസ്’ എന്നതിൽനിന്ന് ‘ഗൂഗിൾ പേ’ എന്നാക്കി റീ ബ്രാൻഡ് ചെയ്യാനും തീരുമാനിച്ചിട്ടുണ്ട്.കേരളം ആസ്ഥാനമായ ‘ഫെഡറൽ ബാങ്ക്’ ഉൾപ്പെടെ നാല് ഇന്ത്യൻ ബാങ്കുകളുമായി സഹകരിച്ചാണ് ഇൻസ്റ്റന്റ് കൺസ്യൂമർ ലോൺ ഗൂഗിൾ ലഭ്യമാക്കുന്നത്.ഇടപാടുകാരുടെ അർഹത അനുസരിച്ച് പരമാവധി അഞ്ചു ലക്ഷം രൂപ വരെയുള്ള വായ്പകൾ ലഭ്യമാക്കും.48 മാസമായിരിക്കും പരമാവധി തിരിച്ചടവ് കാലയളവ്. വ്യക്തിഗത വായ്പയുടേതിനു സമാനമായിരിക്കും പലിശ നിരക്ക്. ഫെഡറൽ ബാങ്ക് ആദ്യമായാണ് ഒരു തേർഡ് പാർട്ടി ഡിജിറ്റൽ മാർക്കറ്റ് പ്ലെയ്‌സ് വഴി വായ്പ ലഭ്യമാക്കുന്നത്. ഫെഡറൽ ബാങ്കിന്റെ ഇടപാടുകാർക്ക് മാത്രമേ വായ്പയ്ക്ക് അർഹതയുണ്ടാവുകയുള്ളൂ. ഫെഡറൽ ബാങ്കിനു പുറമെ, ഐ.സി.ഐ.സി.ഐ. ബാങ്ക്, എച്ച്.ഡി.എഫ്.സി. ബാങ്ക്, കൊട്ടക് മഹീന്ദ്ര ബാങ്ക് എന്നീ ബാങ്കുകളിൽനിന്നുള്ള വായ്പയും ഗൂഗിൾ പേ വഴി ലഭ്യമാകും. ഓൺലൈനിലൂടെ നിമിഷനേരം കൊണ്ട് വായ്പ നേടാൻ ഗൂഗിളിന്റെ സേവനം വഴിവയ്ക്കും.