'DUKAT', ristrukturohet prodhimi

Kompanitë kroate po përgatisin strategjinë se si të mbajnë tregjet në republikat ish-jugosllave pas 1 korrikut, kur vendi do të anëtarësohet në Bashkimin Evropian. Një pjesë e kompanive thonë se i kanë nisur prej vitesh tashmë përgatitjet. Kompania 'Dukat', lidere në industrinë e qumështit, tashmë e ka ndryshuar formën strukturën e funksionimit të saj. Për të evituar taksat e larta, dhe në mënyrë që të mbajë çmime konkurrente, një pjesë e produkteve do e bart në vendet ky vepron Grupimi 'Laktalis' nën të cilin është edhe kompania 'Dukat'. Kështu, kjo kompani synon të mbetet konkurruese në tregjet e Maqedonisë, Bosnjës, Malit të Zi dhe Serbisë.

"Një nga opsionet është ristrukturimi i prodhimtarisë. Një pjesë ta bartim në Bosnjë dhe Serbi. Në opsion është edhe Maqedonia, ku do të shfrytëzojmë disa nga kapacitetet e atjeshme. Me një fjalë, do të kërkojnë mënyrën që të mos ngarkohemi me shpenzime të tepërta", deklaroi Goran Nigedon, drejtor i Prodhimit në "Dukat".

Kroacia tregtonte deri tani, pa dogana dhe në përputhje me kontratat e CEFTA-s. Mirëpo, pas aderimit të saj në BE, ajo do të duhet të paguajë doganë dhe tatime më të larta. Përveç kësaj, hyrja në BE për Kroacinë do të thotë edhe më shumë kontrolle për produktet. Fabrika e qumështit "Dukat" prej kohësh e ka sofistikuar prodhimin e qumështit dhe të produkteve të tij, ndërkohë që pas krizës që krijuar me aflatoksinën, çdo dërgesë e saj do të vazhdojë të jetë nën fokusin e kontrolleve të rrepta.

"Pas aferës me aflatoksinën, çdo dërgesë kontrollohet dy herë. Herën e parë, kur qumështi hyn në fabrikë dhe të dytën, kur produkti është përfundimtar. Çdo dërgesë e dyshimtë tërhiqet menjëherë".

Menaxherët thonë se aflatoksina e luhati shumë tregun e bulmetrave, duke dëmtuar edhe besimin e konsumatorëve në gjithë rajonin. Ata thonë se, edhe pse kriza e aflatoksinës nuk e vogëloi prodhimin, kërkesat u ristrukturuan. Nga kompania 'Dukat' thonë se ndaj krizës, vepruan shpejt dhe në mënyrë efektive, dhe se tani nuk kanë probleme. Të gjitha mostrat ishin sipas Rregullores për praninë e lejuar për aflatoksinë.

"Që kur nisëm të bëjmë kontrolle të vazhdueshme, nuk kemi konstatuar më sasi të lartë të aflatoksinës në qumësht, siç parashikon legjislacioni i BE-së", tha Anica Borovik, drejtor i Kontrollit të Cilësisë në "Dukat".
Pas shpërthimit të skandalit me aflatoksinën, kompania 'Dukat' i tërhoqi për dy javë produktet e saj nga tregu i Maqedonisë. Por pas kalimit të kontrolleve të dyfishta, produktet e saj u rikthyen në raftet e marketeve. Verica Pavlloska