Domenico Giansiracusa - Rommi Carmiluzzu

Recitazione di Nella Palmeri.

Ròmmi, Carmiluzzu, ròmmi ca t'accùcciu,
teni l' òcci ciùsi, e sèntimi nò sonnu.
U sai ca iu ti viru, e nun ti lassu sulu.

Rommi Carmiluzzu, e nàta comu 'npisci
e curri, curri comu o ventu, senza pinsari
ne strati picciriddu, senza scappi, senza friddu.

Ròmmi Carmiluzzu, e vola 'no desertu,
pariìtu nu principi, senza scàntu ni lu pettu.
Nu barracanu, 'nsulcu, 'ncavaddu senza frenu.

Ròmmi, ti pari aièri. Passasti e mi viristi,
e ìu calài l'occi, ca mi mancaia u ciatu,
e a tia parìa stranu, ca ti trimàia a manu.

Ròmmi Carmiluzzu, u sai, nun sugnu luntanu.
Parra e picciriddi, riccillu ca li amu.
Ora ca sunu rànni, capìsciunu cà fattu.

Sputa Carmiluzzu, sputa pùlviri e fangu,
sputa la stanchizza, e dommi senza ciatu.
Rommi cuiètu, ci sugnu ìu, c' agghiù addivatu.

Ròmmi Carmiluzzu, cò tempu miu passàu.
Ma quannu poi ti susi, talìa u ciuri miu.
Ràcci a manu, e bàsila 'na frunti.

Idda è a pena mia, ciù rìcu o Signùri.
Stringila forti, quannu siti sùli,
riccìllu ca mi manca, cu tutta la sò cruci.