Alice Cuenca - (!) Ang paghimatngon

daklit nga kadasig
mialisngaw,
sama sa uphag
nga hangin,
gisuyop
ang yamog
sa akong kaugatan

ang kahigwaos
miduslak niini,
nanglimbasog nga moalisbo
ngadto sa lang-at
nga way kinutuban

makalipong
ang pagtuyok
sa kalibutan,
gipangita ko
ang ulo ug punu-an
niini...


way paghimatngon
sa gasa sa adlaw
nga mibukhad na


ang kagahapon
ug ang ugma,
dili ko mahikap...


dinhi sa hataas nga
kapatagan nag inusara,
nangindahay,
nga makit-an ko
ang kinatibuk-an

Alice Cuenca

http://www.poemhunter.com/poem/ang-paghimatngon/