Acari mban te mberthyer vendin

Dimri i acartë dhe temperaturat e ulëta kanë përfshirë të gjithë vendin. Kjo e martë, sipas sinoptikanëve ishte më e ftohta e javës, ndërsa gjatë natës priten  reshje dëbore edhe në Tiranë, ku termometri pritet të shkojë në disa gradë nën zero. Autoriteti Rrugor Shqiptar këshillon të gjithë drejtuesit e mjeteve që të respektojnë sinjalistikën, sidomos në segmentet Librazhd-Korçë-Kapshticë dhe Korçë-Ersekë, pasi priten reshje bore dhe parashikohen temperatura shumë të ulëta.

Ndërkohë, fshatrat e thella të Korçës, si Mokra, Dardhasi dhe Vithkuqi, vijojnë të mos kenë komunikim me qendrat e njësive administrative për shkak të dëborës së dendur. Nevoja për zhbllokimin e rrugëve kanë detyruar Shtabin e Emergjencave të kërkojë ndihmën e bashkisë.

"Çdo banor i qarkut të Korçës dhe në pikën më të largët duhet të gëzojë shërbimin, qarkullimin e lirë, energjinë, ujin, shërbimin shëndetësor dhe furnizimin me ushqim".

Problematike mbeten edhe segmentet Korçë-Voskopojë dhe Maliq-Opar-Strelcë. Ne veri të vendit mbeten problematike zonat e thella të qarkut të Kukësit dhe Shkodrës. Nga dita e mërkurë pritet një përmirësim i motit, teksa pritet një rritje e lehtë e temperaturave. Për shkak të motit të keq, probleme ka edhe në porte. Prej 2 Janarit të gjitha anijet e peshkimit janë të bllokuara në mol në Portin e Durrësit, deri në një urdhër të kapitenerisë për të dalë në det.

Tv Klan