A Filetta - Vogliu esse (1981)

Vogliu esse lu figliolu
Di quelli di cispre armati
Chì di maghju in fiume Golu
Funu tutti assassinati,
Vogliu esse lu figliolu
Di li corsi impiccati
Oghje ghjornu lu Niolu
Si ramenta l'antenati.

Vogliu esse lu fratellu
Di l'omu ch'hà ricusatu
Per a Corsica ghjuvellu
Un avvene incatinatu,
Vogliu esse lu fratellu
Di l'amichi ditinuti
La so fede hè la stella
Chì luccicherà per tutti.

Vogliu esse lu cumpagnu
Chì mughjà sempre più forte
Cù li populi in lagni
Cambiemu la nostra sorte,
Vogliu esse lu cumpagnu
È di pettu à la morte
Balla nant'à lu Terraniu
Lu quadrigliu di rivolta.

Vogliu esse la cuscenza
Chì disceterà la mente
È chì darà la sperenza
À tante povare ghjente,
Vogliu esse la cuscenza
Ch'ùn puderà mai più sente
In le carne la suffrenza
È tace sempre li pienti.

Vogliu esse la sperenza
Nant'à li monti murtali
Chì purterà la bandera
À la gloria universale,
Vogliu purtati fratellu
La libertà, cusì pura
Chì hè cum'è l'acellu biancu
In la to cellula scura